Монгол дахь Японы худалдааны танхим нь жил бүр Япон улсын Токио хотод Монгол-Японы эдийн засаг, бизнесийн форум, арга хэмжээг бие даан болон хамтарсан байдлаар зохион байгуулдаг. Бид Японы “Эм Ди Эй” ХХК, Монголоос “Улаанбаатар Ассет Менежмент” ХХК нар 2025 оны 3-р сарын 27-ны өдөр Монгол Улсаас Япон Улсад суугаа Элчин сайдын яамтай хамтран зохион байгуулсан “Монгол Улсын эдийн засаг, үл хөдлөх хөрөнгө болон хөрөнгө оруулалтын боломж” сэдэвт бизнес семинарыг дэмжин, хамтран ажиллалаа.
Тус арга хэмжээнд 20 орчим аж ахуй нэгж, бизнес эрхлэгчид оролцсон бөгөөд Монгол Улсаас Япон Улсад суугаа Элчин сайдын яамны Эдийн засгийн зөвлөх Ө.Мөнхбат, Монгол дахь Японы худалдааны танхимын Ерөнхийлөгч Б.Мөнхтуг нар нээлтийн үг хэлж, Монгол Улсын эдийн засаг, үл хөдлөх хөрөнгийн салбарын өнөөгийн нөхцөл байдал, хөрөнгө оруулалтын орчин, хоёр улсын эдийн засгийн харилцааны талаар ярилцаж, мэдээлэл солилцлоо.
Арга хэмжээний үеэр оролцогчид Монгол үндсэний оройн зоог барин, Монгол Японы хоорондын бизнесийн хамтын ажиллагааг өргөжүүлэх талаар, хөрөнгө оруулалтын талаар дотно яриа өрнүүлж, үр дүнтэй мэдээлэл солилцов.
Семинарын хааж Монгол Улсаас Япон Улсад суугаа Онц бөгөөд Бүрэн Эрхт Элчин сайд Б.Баярсайхан оролцогчдод хандан 2025 онд Япон улсын Цог Жавхлант Эзэн Хаан, хатан хоёр Монгол улсад айлчлахаар болсон нь хоёр орны харилцаа ямар өндөр түвшинд байгааг илтгэж байгааг дурдаад, Японы бизнес эрхлэгчдийг Монголд хөрөнгө оруулж, бизнес эрхлэхийг уриаллаа.
