Монгол-Япон хоёр улсын хооронд дипломат харилцаа тогтоосны 50 жилийн ойг тохиолдуулан Монгол дахь Японы Худалдааны Танхим (Japan Chamber)-аас “Golden week” бизнес экспог тавдугаар сарын 13-15-ны өдрүүдэд Мишээл экспо ОУҮХТ-д анх удаа зохион байгуулж, амжилттай өндөрлөлөө. Тус арга хэмжээнд Монгол, Японы 60 гаруй аж ахуйн нэгжийн 100 орчим нэр төрлийн бүтээгдэхүүн, брэндүүд оролцож, үйл ажиллагаагаа сурталчлан хоёр орны эдийн засгийн хамтын ажиллагаанд хувь нэмрээ оруулсан юм.
Экспогоор дамжуулан эдийн засаг, бизнесийн хамтын ажиллагааг өргөжүүлэхээс гадна тус арга хэмжээний хүрээнд “Монгол-Японы Эдийн засгийн түншлэлийн гэрээг үр дүнтэй ашиглах нь”, “Япон менежментийн тухай” зэрэг сэдвүүдээр хэлэлцүүлэг өрнүүлж, шинэ санал санаачилгууд дэвшүүлсэн байна. Түүнчлэн ажлын байранд зуучлах, хүний нөөцийн бааз бүрдүүлэх боломж зорилгоор “Хүний нөөц ба боломж” арга хэмжээг зохион байгуулж, “Project pitch” хөрөнгө оруулалтын төслийг танилцуулан, гарааны бизнес эрхлэгчдэд шинэ боломж нээжээ. Мөн үзэсгэлэнд оролцогчдод зориулан гурван өдрийн турш Япон улсын соёл, уламжлалыг танилцуулан, цайны ёслол үйлдсэнээс гадна “Cosplay ба залуус” өдөрлөгийг зохион байгуулж, хүүхэд залуусынх хөгжил, хүсэл сонирхлыг дэмжин ажилласныг зохион байгуулагчид онцолж байлаа.
“Golden week” экспог Mobicom корпораци, Beauty Japan Mongolia, Moncon Group, BLU Clothing Studio тэргүүтэй аж ахуйн нэгжүүд ивээн тэтгэсэн бол JPNM, Нийслэлийн “Жижиг, дунд үйлдвэр, үйлчилгээг дэмжих төв” НӨҮГ, “Жайка”-гийн Монгол дахь төлөөлөгчийн газар зэрэг байгууллагууд хамтран ажилласан байна.