Монгол-Японы бизнес форум 2023

Монгол-Японы Бизнес Форум нь 2023 оны 8 сарын 18(Баасан, өнөөдөр) хоёр дахь удаагаа зохион байгуулагдлаа.

Тус арга хэмжээг JICA-ийн Монгол дахь Суурин төлөөлөгчийн газраас зохион байгуулж байгаа хамтран зохион байгуулагчаар МҮХАҮТ, Монгол-Японы хүний нөөцийн хөгжлийн төв ажилласан бөгөөд  ЭЗХЯ, Япон улсын ЭСЯ, дэмжиж,  ЖУГАМО, “Монгол дахь Японы Худалдааны Танхим” ТББ хамтран ажиллалаа.

Тус бизнес форум нь Япон улсаас Монгол улсад суугаа Онц бөгөөд бүрэн эрхт Элчин сайд Кобаяши Хироюки болон УИХ-ын гишүүн, Барилга, хот байгуулалтын сайд Ц.Даваасүрэн, Эдийн засаг, хөгжлийн Дэд сайд Г.Түвдэндорж нар нээлтийн арга хэмжээнд мэндчилгээ дэвшүүллээ.

Монгол-Япон улсын хувийн хэвшлийн хамтын ажиллагааг дэмжих, бодит үр дүн гаргах зорилго бүхий тус бизнес форумын үеэр “Шинэ Зуунмод хот болон Эдийн засгийн чөлөөт бүсийн хөгжлийг дэмжих төсөл”-ийн хэлэлцээрийн баримт бичигт гарын үсэг зурах ёслол боллоо.

Ингэснээр Хөшгийн хөндийн шинэ “Чингис хаан” ОУНБ болон түүний эргэн тойронд эдийн засгийн хөгжлийн бүс бий болох хөгжлийн төслүүдийг бодитой ажил хэрэг болгоход түлхэц болох техникийн туслалцааг Япон улсын зүгээс үзүүлэх боломж бий болно.

Мөн бизнес хамтын ажиллагаанууд болон гарааны бизнесийг дэмжих төслүүд, Монголын нийгэмд тулгамдаж байгаа асуудлуудыг шийдвэрлэх нийгмийн төслүүдийн үр дүнгүүд танилцуулагдаж, бизнес уулзалт, нэтворкинг арга хэмжээнүүд боллоо.

Мөн JICA-ын төлөөлөгчийн газраас танилцуулга илтгэл, Монгол-Японы хүний нөөцийн хөгжлийн төвөөс Монголд бизнес эрхэлж байгаа Япон компаниудын бизнес, тэдний аль салбарт хэрхэн бизнес эрхэлж байгаа болон Монголд бизнес эрхлэх онцлог, давуу болон сул талын тухай танилцуулгуудыг хийлээ.

Тус танхимын Удирдах зөвлөлийн гишүүн Ц.Дөлгөөн тус бизнес форумын дэд хэсгийн модератороор ажиллахаас гадна “Монгол Япон хоёр улсын экспортын ахиц дэвшил, худалдаа херенге оруулалтыг дэмжих талаар” сэдэвт панел хэлэлцүүлэгт панелистаар оролцлоо.