Монгол Улс болон Япон улс 1972 оны 2 дугаар сарын 24-ний өдөр дипломат харилцаа тогтоосон бөгөөд энэ онд 50 жилийн ой тохиож, хоёр орон ёслол төгөлдөр тэмдэглэн өнгөрүүлж байна.Тухайн онд манай улс Токио хотод Элчин сайдын яамаа байгуулж байсан бол Япон улс 1973 онд Элчин сайдын яамаа Улаанбаатар хотод байгуулсан түүхтэй. Хагас зуун жилийн ойг 2022 оныг дуустал тэмдэглэн өнгөрүүлэх бөгөөд хоёр улсын ард түмний найрамдлыг бататгаж, харилцааг бэхжүүлэхэд чиглэсэн, дээд өндөр түвшний харилцан айлчлал, эрдэм шинжилгээний хурал, хүндэтгэлийн хурал, хүүхэд, залуучуудын солилцооны хөтөлбөр, гэрэл зургийн үзэсгэлэн, хувийн хэвшлийн харилцаа, хамтран ажиллах боломжийг нэмэгдүүлэх бизнес уулзалтууд зэрэг олон арга хэмжээг төлөвлөсөн байна.